هل تعرف او تعرفين كيف تعمل عمرة كاملة و انت فى بيتك ؟

بسم الله الرحمن الرحيم

اللهم صل على محمد وعلى آله وصحبه أجمعين

السلام عليكم ورحمة الله وبركاته

مسلمه :ما تيجي نحج او نعمل عمره النهارده ؟؟؟؟

اختها في الله : ده علي اساس انك حجزالنا تذكرتين طيران سريع وعاملهالي مفاجأه
...
مسلمه : ها ها ها لاء ظريفه.. بس اصبري طيب عليا وبلاش تريقه وانا هفهمك

اختها في الله :اتفضلي يا ستي اطربيني وهاتي ما عندك :
مسلمه :ماشي ماشي اتريقي براحتك ...خلاص مش هقولك اصلا وانتي الخسرانه

اختها في الله :خلاص خلاص ...انا بهرج معاكي يا بنتي . يلا قولي بقي انا عاوزه اعرف بجد

مسلمه :ماشي هقولك بس بشرط بعد ما تعرفي تدعيلي دعوه حلوه كده بكره ان شاء الله عالفطار

اختها في الله :اتفقنا يا ستي ...يلا بقي قولي بسرعه عاوزه افهم قصدك

مسلمه :طيب يا ستي اسمعي كده الحديث ده وبعدين هشرحهولك

قال رسول الله صلى الله عليه وسلم:
«من صلى الفجر في جماعة ثم قعد يذكر الله حتى تطلع الشمس ثم صلى ركعتين كانت له كأجر حجة وعمرة تامة تامة تامة».

اختها في الله: الله الحديث ده جميل اوي فعلا واول مره اسمعه

مسلمه : ايوه يا بنتي وده معناه ان اللي يصلي الفجر في جماعه وبعد كده قعد يذكر الله لحد طلوع الشمس وبعدها صلي ركعتين يتحسبله اجر انو عمل حجه او عمره ان شاء الله

بس خدي بالك من حاجه الحديث ده معناه انو الولاد لازم يصلوا الفجر حاضر في المسجد في جماعه ويقعدوا بقي يذكروا الله لحد طلوع الشمس مش يصلوه في البيت ويقولوا يتحسبلنا الاجر

اختها في الله : ايه ده طيب واحنا البنات؟؟؟؟ احنا صعب اوي علينا نصلي الفجر في المسجد وكمان نقعد فيه لبعد طلوع الشمس

مسلمه : لاء ما انا هقولك بقي
الاراء اختلفت في الموضوع ده ما بين مؤيد ومعارض بس في اغلبيه بتقول انو اصلا الست مش عليها صلاه الجماعه ومحبب ليها الصلاه في بيتها افضل وعلشان كده ان شاء الله

لما تصلي الفجر في بيتها وتقعد تذكر الله لحد الشروق وبعدها تصلي ركعتين وتحتسب الاجر عند ربنا سبحانه وتعالي
وان شاء الله ربنا يتقبلها منها ويحسبلها زي الرجل تمام

وشوفي كده معايا الفتوي ديه

هل هذا الفضل يكون للنساء –أيضاً- إذا صلين في بيوتهن، وهل يشترط لهذا الفضل أن تكون الصلاة في جماعة، أي هل يكون للمرأة إذا صلت في بيتها وحدها في غير جماعة، وقعدت تذكر الله حتى تطلع الشمس، ذلك الفضل؟

نعم، يرجى لها ذلك، يرجى لها هذا الخير العظيم

للشيخ العلامة ابن باز

-----------

ليس على المرأة صلاة الجماعة ، وصلاتها في بيتها وحدها أفضل من الجماعة ، وإذا صلت الفجر في بيتها وجلست تذكر الله إلى الشروق ثم صلت ركعتين كتبت لها عمرة وحجة تامة حالها كحال الرجل ، وفضل الله واسع وله الحمد والمنة
والله أعلم
------------

اختها في الله : بجد كلام حلو اووووي وصح طبعا ان الله لايضيع اجر من احسن عملا

مسلمه : تماااام ولازم يكون عندنا حسن ظن بالله علشان كده بنقول تحتسب الاجر عند الله سبحانه وتعالي

اختها في الله : ربنا يكرمك يا اختي علي المعلومات الجميله ديه وان شاء الله انا هعمل حجه او عمره قريب

مسلمه : لاااااء استني ...قريب مييييييييييين احنا عاوزين نعملها النهااااارده ان شاء الله

اختها في الله : اشمعني يعني النهارده ما انا نويت بجد وهعملها قريب

مسلمه : لاء طبعا لان النهارده مش زي اي يووووووم

النهارده هيبقي فجر 9 ذو الحجه يعني فجر يوم عرفه

اختها في الله : طيب وايه الفرق يعني لما نعمل كده في فجر يوم عرفه او اي يوم تاني؟؟؟

مسلمه : اقولك يا ستي ايه الفرق

قال النبي صلى الله عليه وسلم : (ما من عمل أزكى عند الله - عز وجل- ولا أعظم أجرا من خير يعمله في عشر الأضحى قيل: ولا الجهاد في سبيل الله - عز وجل- ؟ قال ولا الجهاد في سبيل الله - عز وجل- إلا رجل خرج بنفسه وماله فلم يرجع من ذلك بشيء) رواه الدارمي

وده معناه ان العمل اللي نعمله في الايام المباركه ديه وخصوصا بقي لما يكون ليله يوم وقفه عرفه اكيد ان شاء الله اجرها عند ربنا سبحانه وتعالي بيتضاعف

والله يضاعف لمن يشاء

اختها في الله : ايوه صح عندك حق .. خلاص يبقي ننويها النهارده باذن الله

مسلمه : شاطره يا اختي وحبيبتي ..بس اوعي تنسي تنوي الصيام

اختها في الله : لا طبعا مش هنسي وديه بقي انا عارفاها ..اننا بنصوم يوم وقفه عرفه

مسلمه : تمام يا اختي ربنا يبارك فيكي وطبعا فضل صيام اليوم ده واضح من الحديث اللي بيقول

جاء عن النبي صلى الله عليه وسلم أنه قال :" صيام يوم عرفه أحتسب على الله أنه يكفر السنة التي قبله والسنة التي بعده " [ رواه مسلم ]

اختها في الله : ما شاء الله ربنا يكرمنا ويكتبلنا كل الخير ده يارب

مسلمه : اللهم امين اختي ...وكمان متنسيش تكثري من التسبيح والتهليل والدعاء
وافضل دعاء نقوله ان شاء الله هو اللي هقولهولك في الحديث اللي جاي ده

عن أبي هريرة قال: قال رسول الله صلى الله عليه وسلم"من قال لا إله إلا الله وحده لا شريك له له الملك وله الحمد وهو على كل شيء قدير في يوم مائة مرة كانت له عدل عشر رقاب وكتبت له مائة حسنة ومحيت عنه مائة سيئة وكانت له حرزا من الشيطان يومه ذلك حتى يمسي ولم يأت أحد بأفضل مما جاء به إلا رجل عمل أكثر منه"[متفق عليه]

اختها في الله : تسلميلي يا مسلمه وربنا يقدرنا جميعا ويتقبل منا يااارب

مسلمه :اميييييييييييين يا رب العالمين

وانتوا بقي اخواني واخواتي في الله

استاذن حضراتكم
في سماع ا كلام اختنا المسلمه
وانكم النهارده ان شاء الله تزودوا في صلاه القيام
و لا تنسوا صيام يوم عرفة
تقبل الله منا ومنكم صالح الاعمال جميعا
و جزاكم الله عنا كل خير